UMGADLI weMamelodi Sundowns, uPeter Shalulile, exinwe nguZin-Eddine Derrag we-AS FAR Rabat emdlalweni weCaf Champions League eLoftus Versfeld, ePitoli, izolo ebusuku Isithombe:BACKPAGEPIX
Mamelodi Sundowns (1) 1
AS FAR Rabat (0) 1
UKUYEKA kweMamelodi Sundowns ingqayizivele yethuba lokuqeda eqhulwini ku-Group B weCaf Champions League kungase kuyiqhathe ne-Orlando Pirates kuma-quarterfinal alo mqhudelwano azoqala ngasekupheleni kukaMashi.
ISundowns idlale ngokulingana ne-AS FAR Rabat yaseMorocco emdlalweni wokugcina wesigaba samaqoqo weChampions League eLoftus Versfeld, ePitoli, izolo ebusuku. Lokhu kuyenze yaqeda endaweni yesibili kuGroup B, okuyibeka engcupheni yokubhekana nePirates eqede eqhulwini kuGoup C.
Amaqembu aqede eqhwakele emaqoqweni ngeke aqhathwe wodwa kodwa azobhekana nalale isibili.
Emdlalweni ne-AS FAR, inkundla ivulwe nguPeter Shalulile esiwombeni sokuqala, ngaphambi kokuthi u-El Amine Zouhzouh ashayele ezakhe elokulinganisa ngesesibili.
Kucishe kwalalwa kungadliwe umdlalo unemizuzu eyisikhombisa uqalile kodwa ukushesha kweSundowns ukuthola igoli kuyikhulule ezintweni eziningi.
ISundowns iqale lo mdlalo yazi kahle kamhlophe ukuthi uma ishaya udaka kusenethuba lokuthi iyizwe ngendaba eyama-quarterfinal alo mqhudelwano.
Ngakolunye uhlangothi, i-AS FAR iwuqale yazi ukuthi isivele inayo indawo kuma-quarterfinal kwazise ingene enkundleni ivele iqhwakele kuGroup B.
Kucace zisuka ukuthi iSundowns izele amaphuzu amathathu okufakazelwe wukushaya kwayo igoli kade kuyi-freekick kaLucas Ribeiro ngomzuzu ka-13.
Iwupholisile umdlalo iSundowns ngemuva kwegoli okukhombise izimpawu zokukhula kwayo kulo mqhudelwano. Lokhu bekwenza i-AS FAR ingaqondi noma kufanele ihlale emuva kumbe ihlasele. Ligcine lisebenzile leli qhinga kwazise umdlalo uhambe ngendlela yeSundowns kwaze kwaba kuyiwa ekhefini.
Okusheshe kwacaca wumfutho ohlukile kwi-AS FAR zisanda kubuya ekhefini. Lokhu bekulokhu kuyikhumbuze njalo iSundowns ngobumqoka begoli lesibili.
Kuphinde kwagqama lokhu ngomzuzu ka-68 lapho uRibeiro eshaye khona ipali langakubo selimdlile uRonwen Williams obenamaphutha kulo mdlalo.
Umdlalo uqhubeke kanjalo kuminciwe kwaze kwaba umzuzu ka-83 lapho uZouhzouh ephule khona izinhliziyo zabalandeli beSundowns ngegoli lokulinganisa.
Related Topics: