Kuzojabula abaningi ngomshado weCoca-Cola neJack Daniels
ABATHANDA ugologo bayakwazi ukubaluleka kokuba ne-dash efanele uma ufuna ukuqeda ukoma ngemuva kosuku olude.
Abaningi bazosijabulela isiphuzo esifika sesideshiwe okusho ukuthi umuntu uzothenga isiphuzo esisodwa ajabule, esikhundleni sokuhlanganisa imali yebhodlela kuphinde kuhlanganiswe nenye yedeshi eceleni.
Izinkampani ezimbili ezinkulu nezihlonishwayo zihlangene ngenhloso yokuthokozisa abomayo. IBrown-Forman Corporation neCoca-Cola Company bethula isiphuzo esisha esesididiyeliwe esihlanganisa iJack Daniel’s neCoca-Cola.
Lesi siphuzo sethulwe kuleli ngemuva kokwenza kahle emazweni afana ne-United States, Mexico, neJapan.
UPeter Orfanidis ongumphathi weSouthern Africa, Brown-Forman uthe bakuthakasele ukwethula lesi siphuzo eNingizimu Afrika ngoba balethela amakhasimende abo okuhlukile okuhlanganisa iziphuzo eziyintandokazi.