Imizimba yamajoni oMzantsi Afrika iza kufika ngoLwesine
Umkhosi woMzantsi Afrika (SANDF) ubhengeze ukuba ukunikezelwa kwemizimba yamajoni alishumi elinesine abulewe eDemocratic Republic of Congo (DRC), kuza kwenzeka ngomso ngoLwesine.
La majoni abulawa kwinyanga ephelileyo eGoma, eDRC, kungquzulwano neqela labavukeli iM23.
Ukubuyiswa kwemizimba yabo kuye kwalibaziseka, nto leyo eshiye amalungu osapho lwala majoni engakwazi kuzila ngokufanelekileyo.
Ngexesha lengxoxo-mpikiswano eshushu kwiNdlu yoWiso-mthetho malunga nokubhubha kwamajoni oMzantsi Afrika eDRC ngoMvulo, uMphathiswa woMkhosi uAngie Motshekga, ungqinile ukuba imizimba iza kubuyiselwa kweli lizwe ngoLwesine.
UMotshekga uthe asixhenxe kula majoni asuka eLimpopo, amathathu ngawaseFreyistata, ze amanye amadoda asuka eMntla Ntshona, eMpuma Koloni naseMntla Koloni.
Uye wathi onke amajoni aza kungcwatywa ngembeko epheleleyo yasemkhosini ngokuzinikela kwawo.
Imizimba yala majoni bekumele iziswe eMzantsi Afrika kwiveki ephelileyo, kodwa kwabakho ulibaziseko.
Kwimpelaveki, iSANDF ithe imizimba yala majoni ithathwe eDRC yasiwa kwiziko leZizwe eziManyeneyo, iUnited Nations Logistics Base e-Entebbe, eUganda.
Ngentsasa yangoLwesithathu, isithethi seSANDF uSiphiwe Dlamini uqinisekise ukuba umsitho wokunikezelwa kwemizimba nenkonzo yesikhumbuzo samajoni uza kuqhutywa ngoLwesine, umhla we13 kweyoMdumba 2025 kwisiseko somkhosi womoya eSwartkop.
Uthe elona xesha lwayo yomibini misitho liza kubhengezwa kamva.